புதன், 19 மே, 2021

கொரேனா சாவ கிராம்பு சாப்டுங்கோ

"என் பெயர் டாக்டர் வி.சம்பத்குமார், விமல் ஜோதி கல்லூரியில் பேராசிரியராக பணிபுரிகிறேன்" என்று துவங்கி ஒரு பெரும் அறிவாளி பேசும் ஒரு வீடியோ வாட்ஸ் அப்பில் சுற்றிக் கொண்டிருக்கிறது. முக்கியமாக வயதான பெரியவர்கள் உள்ள குரூப்புகளில். அவர்கள் தான் "எத்தைத் தின்றால் பித்தம் தெளியும்" என்று சுற்றிக் கொண்டிருக்கிறார்களே. போதாக்குறைக்கு லாக் டவுன் வேறு. வேறு வேலை இல்லை. எல்லா குரூப்புக்கும் ஃபார்வர்டு செய்வோம் என்று அனுப்பி வைக்கிறார்கள்.

அந்த வீடியோவில் திரு. சம்பத் சாரி, டாக்டர். சம்பத் முதலில் ஒரு ஆக்ஸி மீட்டர் பயன்படுத்தி தன் ஆக்ஸிஜன் லெவலை செக் செய்கிறார். பிறகு இரண்டு கிராம்பு எடுத்து மென்று விட்டு அதன் பிறகு மறுபடி ஆக்ஸி மீட்டரைப் பயன்படுத்தி தன் ஆக்ஸிஜன் லெவல் ஏறிவிட்டது என்று காண்பிக்கிறார். எனக்குப் புல்லரித்து விட்டது. மேலும் கிராம்பு தின்றால் அது கொரோனா வைரஸைக் கட்டாயம் கொன்று விடும் என்றும், ஒவ்வொரு முறை மாஸ்க் அணிவதற்கு முன்பு இரண்டு கிராம்பு தின்னும் படியும் பரிந்துரைக்கிறார். கொரோனா வராதாம்.
(ஒரு டாக்டருக்கு, என்ஜினியரிங் கல்லூரியில் என்ன வேலை? அவர் பிஹெச்டி டாக்டரா? அலோபதி டாக்டரா? அதெல்லாம் கேட்கக் கூடாது. எந்த வயதுக் காரர்கள் இரண்டு கிராம்பை திங்க வேண்டும்? 3 வயது குழந்தை? 75 வயதுப் பெரியவர்? இவர்கள் தின்னா பேதியாகுமே? என்றெல்லாம் கேட்கக் கூடாது)
இவ்வளவு பெரிய அறிவாளியை ஏன் இந்திய மருத்துவத்துறை இன்னும் கண்டுகொள்ளாமல் புறக்கணிக்கிறது என்று தெரியவில்லை? இவரை உடனடியாக அங்கீகாரம் செய்து தமிழக அரசு அவார்டு கொடுத்து, இவரது பரிந்துரையின் பேரில் அனைத்து அரசு ஆஸ்பத்திரிகளுக்கும் அஞ்சஞ்சு மூட்டை கிராம்பு சப்ளை செய்ய ஆவன செய்யவேண்டும்.
மேலும் ஆக்ஸிஜன் சிலிண்டர்கள் தயாரிக்க வேண்டி வேதாந்தா போன்ற நிறுவனங்களைக் கெஞ்ச வேண்டியதில்லை. கிராம்பு தின்றால் ஆக்ஸிஜன் ஏறி விடுகிறதே. எதற்கு ஆக்ஸிஜன் சிலிண்டரும், சிகிச்சையும்?. முடிந்தால் ரேசன் கடைகளில் அந்த 4000 ஓவா கொடுக்கும் போது கூடவே ஒரு 400 கிராம் கிராம்பு பாக்கெட் கொடுக்கச் சொல்லவும்.
டாக்டர். சம்பத்குமாருக்கும், அந்த வீடியோவை ஃபார்வர்டு செய்பவர்களுக்கும் ஒரு கோரிக்கை. உங்களுக்கு கொரோனா வரும்போது இதே போல இரண்டு கிராம்பு வேண்டாம். 200 கிராம்பு எடுத்து வாயில் போட்டு மெல்லவும். ஆஸ்பத்திரிக்குப் போக வேண்டாம் என்று தாழ்மையுடன் கேட்டுக் கொள்கிறேன். நன்றிகள்.
இப்படிக்கு
வேக்ஸின் போட ஸ்லாட் கிடைக்காமல் தடுமாறும் தமிழன்.

ஞாயிறு, 16 மே, 2021

கோவிட் மரணங்களும், அது சார்ந்த நிதிச் சிந்தனைகளும் - எஸ்கா

இன்று மற்றொரு அதிர்ச்சி. மற்றுமொரு கோவிட் மரணம். நண்பனின் தம்பி.. 37 வயது இருக்கும். சென்ற வாரம் மூச்சுத் திணறல் இருக்கவே, ஆஸ்பத்திரியில் சேர்த்திருக்கிறார்கள். இன்று காலை 3 மணிக்கு இறந்திருக்கிறான். "தம்பி மூஞ்சிய சரியா பாக்கக்கூட முடியல, ஒரு மாலை போட முடியல, அரை மணி நேரம் கூட இருக்க முடியல, எடுத்துட்டுப் போய் எரிச்சிட்டாங்க" என்று நண்பன் போனில் குரல் கலக்கமாக ஒலித்தது.
கொரோனா எதிர்பார்க்கவே முடியாத எல்லோரையும் கொள்ளை கொண்டு போய்க் கொண்டிருக்கிறது. யாருமே பாதிப்புக்கு விதிவிலக்கில்லை. வேலை செய்யலாம் என்று எடுத்து வைத்த லேப்டாப்பை மூடி வைத்து விட்டு ரூமுக்குப் போய்விட்டேன். இரண்டு மணி நேரம் சாப்பிடத் தோன்றவில்லை. படுத்துப் புரண்டபடியே இருந்தேன். ஏதேதோ எண்ணங்கள். அதில் பணம் குறித்துத் தோன்றிய சிலவற்றை இங்கே சொல்லலாம் என எழுதுகிறேன்.



நீங்கள் ஆணோ பெண்ணோ.. சம்பாதிக்கும் மனிதராக இருந்தால், நீங்கள் இறந்து விட்டால் (டச் உட் - நடக்கக் கூடாது) என்னென்ன செய்ய வேண்டும் என்று ஒரு நோட்டில் குறிப்பெழுதி வையுங்கள். ஆன்லைனில் புழங்குபவர் என்றால் ஒரு எக்ஸெல் ஃபைலோ, கூகிள் ஸ்ப்ரெட்ஷீட்டோ உருவாக்கி அதை உங்கள் மனைவி (அ) கணவன் (அ) உங்களை நம்பி உள்ள ஒருவரிடம் கொடுத்து வையுங்கள் (அ) மெயிலில் ஷேர் செய்யுங்கள்.
உங்கள் கடன் எவ்வளவு? யார் யாரிடம் நீங்கள் வாங்கியிருக்கிறீர்கள்? வண்டி வாகன லோன் உண்டெனில் அதன் அக்கவுண்டுகள், டாகுமெண்டுகள் விபரம், ஹவுஸிங் லோன் இருந்தால் அதன் விபரம், அந்த லோன் உங்கள் மறைவின் மேல் இன்ஷூரன்ஸ் செய்யப்பட்டிருக்கிறதா? என்று தேடி அதன் விபரம். சின்னக் கடன்கள், பெரிய கடன்கள் என வேறேதாவது இருந்தால் அவற்றின் அசல், வட்டி விபரங்களை குறித்து வையுங்கள். கடன் தந்தவர்களின் பெயர், போன் நம்பர்கள் உட்பட.
வருமான வகையில் - யார் யார் உங்களுக்கு எவ்வளவு தரவேண்டும்? அதன் விபரங்கள் பெயர், தொகை, அட்ரஸ், மொபைல் நம்பர் உட்பட. உங்கள் பேங்க் அக்கவுண்டுகள் என்னென்ன? அதன் பாஸ்புக்குகள் எங்குள்ளன? ஆன்லைன் அக்கவுண்ட் எனில் அதன் யூஸர் நேம், பாஸ்வேர்ட் என்ன? சொத்துகள் இருந்தால் அவை எங்கே உள்ளன? அதில் வாடகை வருமானம் வந்தால், அதன் விபரங்களைக் குறித்து வையுங்கள்.
இன்வெஸ்ட்மெண்டுகள் இருந்தால் அவை என்னென்ன? பிக்ஸட் டெபாஸிட்கள், ஷேர்கள், மியூச்சுவல் பண்டுகள் விபரங்கள், அவற்றின் டாகுமெண்ட்கள், ஆன்லைன் இன்வெஸ்ட்மெண்டாக இருந்தால் அந்த ஆப்-களின் யூஸர் நேம், பாஸ்வர்டுகள் என ஒன்று விடாமல் - அவை எல்லாவற்றையும் சுலபமாகப் புரியும் வகையில் குறித்து உங்கள் துணையிடம் கொடுத்து வையுங்கள்.
சொத்து முதல், இன்வெஸ்ட்மெண்ட்கள் வரை எல்லாவற்றிலும் மறக்காமல் (உங்களுக்குப் பிறகு யாருக்குப் பணம் போக வேண்டுமோ அவர் பெயரில்) நாமினேஷன் போட்டு வையுங்கள். உயில் கூட எழுதி வைக்கலாம் என்கிறார்கள். தேவை இருந்தால், உங்களால் இயன்றால் அதையும் செய்து வைக்கலாம். தவறில்லை.
தயவுசெய்து இன்ஷூரன்ஸ் செய்து வையுங்கள். நீங்கள் இறந்தால் (மட்டும்) பணம் வரும் வகையில் டிசைன் செய்யப் பட்டுள்ள ஒரு டெர்ம் பாலிஸி எடுத்து வையுங்கள். எல்ஐசி உசிதம். 25 இலட்சமோ, ஒரு கோடியோ உங்கள் வருமான வரம்புக்கு வாய்ப்புள்ள வகையில் எடுங்கள். ப்ரீமியமும் குறைவாக இருக்கும். உங்கள் இறப்புக்குப் பிறகு உங்கள் குடும்பம் சுதாரித்து நிற்க மூன்று நான்கு ஆண்டுகள் ஆகும் வரை அவர்கள் தடுமாறாமல் இருக்கும் வகையில் எடுத்து வையுங்கள்.
குறிப்பு - இவற்றில் பெரும்பாலானவற்றை நான் செய்து வைத்திருக்கிறேன்.
தயவு செய்து வேக்ஸின் போடுங்கள். அஜாக்கிரதை வேண்டாம். சுகாதாரத் துறை சொல்லும் அனைத்து தற்காப்புகளையும் மேற்கொள்ளுங்கள். அக்கம் பக்கத்தில் கொரோனா மரணம் நிகழ்ந்தால் மனதைக்கல்லாக்கிக்கொண்டு, தூரத்தில் நின்று அந்தக் குடும்பத்தின் சோகத்தை உணருங்கள். மனதில் ஒரு பயத்தை உருவாக்கிக் கொள்ளுங்கள். பிரச்சினையின் வீரியம் புரியும். மேற்சொன்னவற்றைச் செய்து வைத்துக் கொள்வீர்கள்.

If you love people, plz share this post.

வியாழன், 13 மே, 2021

சரிலேரு நீக்கெவ்வரு சூப்பர் ஸ்டார் மகேஷ் பாபுலு

10 மே 2020 அன்று ஃபேஸ்புக்கில் எழுதியது.

நீண்ட நாட்கள் இன்டஸ்ட்ரியில் இல்லாத வயதான ஹீரோயின் (சாந்தி..... விஜயசாந்தி) நடிக்க வருகிறார். கம் பேக் மூவி. அப்போ அவருக்கு ஒரு கெத்தான வேஷம் வேணும். கெத்தா சீன் வைக்கணும். என்ன வைக்கலாம்? காலேஜ் ப்ரொபஸர் வேஷம். சூப்பர்ல. அவர் தப்பு செய்கிற ஒரு ரவுடி காலேஜ் ஸ்டூடண்ட்டை அடிக்கிறார். தட்டிக் கேட்கிறார். வெய்ட், வெய்ட். இது எங்கயோ பார்த்த மாதிரி இருக்கே. அடப் பாவிகளா "அம்மா, நானா ஓ தமிழ் அம்மாயி" (எம்.குமரன்) அம்மா இன்ட்ரோ சீனை அப்படியே வைப்பீங்களாய்யா?

ஹீரோ ராணுவத்தில் இருப்பார். உலகமகா புத்திசாலி. பலசாலி எல்லாம் அவர்தானாம். தீவிரவாதியை சரியாக நடு நெற்றியில் தான் சுடுவாராம். மற்றவர்கள் யார் கண்ணுக்குமே தெரியாத (ஷூவுல சேறு) க்ளூவை இவர் மட்டுமே சரியாகக் கண்டுபிடிப்பாராம். டேய்...
ஒன் மேன் ஆர்மியாக பாகிஸ்தான் தீவிரவாதிகளைப் பறந்து பறந்து அடித்து, "எக்ஸ்ட்ரா ஃபோர்ஸ் வேணுமா?" என்று கேட்கும் உயரதிகாரிகளிடம் "ஒத்து ஸார், ஒச்சே ஜன்மாஷ்டமி நாடு, நேனே ஒச்சி, வால்லனி சம்ப்பி, கால்ச்சி, பூடுத சேஸி" என்று சந்திரமுகி ஜோதிகா டயலாக்கோடு எல்லாரையும் சுட்டுக் கொன்று, அதுவும் சரியாக நடு நெற்றியில், வெற்றி வாகை சூடி வருகிறார். நமக்குக் கொட்டாவி வருகிறது.
இராணுவ வீரர்களைப் பார்க்க செலிப்ரிட்டி வருகிறார் என்று நடிகை தமன்னாவை, தமன்னாவாகவே அழைத்து வந்து "வீரர்களே, என்ஜாய்" என்று தொப்புள் தெரிய ஒரு குத்தாட்டம். எந்த ஊர் ராணுவத்துலய்யா இதெல்லாம் நடக்குது? என்று வாய்விட்டுக் கேட்க வைக்கிறார்கள். இந்தக் கருமத்தையும் எத்தனையோ படத்தில் பார்த்தாச்சு. இன்னும் எத்தனை நூற்றாண்டுகளுக்கு இப்படி நம்ப முடியாத காட்சிகளும், பாடல்களும் வைப்பார்களோ?
இதுக்கெல்லாம் மேலே ஹைலைட். அடிபட்ட ராணுவ வீரனைப் பற்றி தகவல் சொன்னால் அவர்கள் குடும்பம் வருத்தப்படும், "அவங்க வீட்ல கல்யாணம் வச்சிருக்காங்க, அதனால் நம் சார்பாக யாராவது அவர்கள் வீட்டுக்குப் போய் 15 நாள் தங்கி அந்தக் கல்யாணத்தைக்கூட இருந்து நடத்திக்கொடுத்து விட்டு வரணும்" என்று மீட்டிங் போட்டு அதே பேரில் உள்ள ஹீரோவை அனுப்புவாங்களாம். "டேய் நீங்க ராணுவமா? இல்ல ப்ரோகிதர் டீமா? இவர் இல்லைன்னா அவரை அனுப்ப?"
ஹீரோவிடம் "உனக்குத்தான் குடும்பம் இல்லைல, அவங்களை குடும்பமா நெனச்சிக்கோ" என்று எக்ஸ்ட்ரா பிட்டு வேறு. அதுக்கும் மேல "உனக்குப் பிடிச்ச யாரையாவது நீ கூட்டிட்டுப் போகலாம்"னு ஒரு சலுகை. எதுக்கு? படம் பூரா ஹீரோ கூடவே வந்து மொக்கை போட்டு நம்ம கழுத்தை அறுக்கணும்ல, அதுக்கு.
பயங்கரமான வில்லன். பிரகாஷ் ராஜ். ரிட்டையர் ஆன தன் பள்ளி வாத்தியாரைக் கூட்டி வந்து நீ நீதி-ன்னு சொல்லிக் கொடுத்த எல்லாமே தப்பா இருக்குன்னு சொல்லி, செஞ்சிக் காட்டுவாராம் ஏய், ஏய்ன்னு கத்திக்கொண்டு. கத்திகள், கபடாக்கள், வெட்டிருவேன், குத்திருவேன் என்று 77 ரவுடிகள், டாட்டா சுமோ, அட்டைன்னு தெளிவாத் தெரியும் ஒரு கோட்டை செட்டு. இது போக இவருக்கே 55-60 வயசுத்தோற்றம். வாத்தியார் ரிட்டையர் ஆனவர்னா ஒரு 60 வயசு. அப்போ இவருக்கு 10 வயசு இருக்கும் போது அவரு 15 வயசுல பாடம் எடுத்தாரா? முடியல பாஸ். ஒரு லாஜிக் வேணாமா?
இப்படி வரிசையாக எதிர்பார்க்கிற சீன்ஸே வந்தால் கடுப்பாகுமா? ஆகாதா? அதிலும் எத்தனையோ படங்களில் பார்த்த காட்சிகள். அல்லது மரண மொக்கைக் காட்சிகள்.
அடுத்து ஹீரோயின் இன்ட்ரோ. முன்னே பின்னே தெரியாத டி.டி.ஆரிடம் ஃபேமிலி கதையைச் சொல்லி இன்ட்ரோ ஆகிறார்கள். அப்போ டிரெயினில் போகும்போதெல்லாம் ஒவ்வொரு டி.டி.ஆரிடமும் இப்படி இன்ட்ரோ கொடுத்துக் கொண்டே போவார்களோ?




பொதுவாக ஹீரோயின் தான் அரைலூஸாக இருக்கும். இங்கே அவங்க அம்மா (அவ்வளவு இளமையான 40 வயது ரசிகா எனும் சங்கீதா, 25/28 வயசுப் பொண்களுக்கு அம்மாவாம், அதுக்கு ஒரு சப்பை காரணமாம்), அப்பா, ரெண்டு அக்காஸ், ரெண்டு மாப்ளைஸ், புதுசா வரப்போகும் சம்பந்தி என்று எல்லாருமே அரைலூஸூகள். டி.டி.ஆரிடம் பெண்கள் எல்லாம் வழிவது, 45 வயதுள்ள அவர் போய் ஹீரோயின் அப்பாவை எதிர்த்துப் பேசுவாராம். யம்மா... பிரம்மானந்தம் செய்த பழைய பட மொக்கைகள்.
இத்தனை கருமமும் ஆஸ்கர் அவார்டு வாங்கத் தகுதியுள்ள நடிப்பு நாயகன் சவசவ எக்ஸ்ப்ரஷன் கிங், சூப்பர் ஸ்டார் மகேஷ் பாபுலு நடித்த "சரிலேரு நீக்கெவ்வரு" படத்தின் முதல் 20 நிமிடங்களில். யாரோ முறைக்கிற மாதிரி இருந்தது. திரும்பிப் பார்த்தால் என் தங்கமணி. இதோ க்ளோஸ் பண்ணிடுறேன் என்று லாக் அவுட் செய்து விட்டேன்.
படம் சூப்பர் ஹிட் வேறயாம். வெளங்கும்.

திங்கள், 3 மே, 2021

பத்மஸ்ரீ விவேக்

பத்மஸ்ரீ விவேக் - மறைவின் போது அவருக்கு ஒரு ட்ரிப்யூட் வீடியோ போடலாம் என்று எங்க டீம் முடிவெடுத்தோம். அதற்காக நான் எழுதிய ஸ்க்ரிப்ட் இது.

அந்த வீடியோ லிங்க் இது
------------------------------------------------------------------------------
நகைச்சுவை நடிகர் திரு விவேக் அவர்களுடைய மறைவு திரைப்படத்துறைக்கு மட்டுமில்லீங்க நம்மளைப் போல சாதாரண மக்களுக்கும் ஒரு மிகப்பெரிய இழப்புதான் ஏன்னா நம்ம தினசரி வாழ்க்கையில நமக்கு இருக்குற ஆயிரம் பிரச்சனைகளையும் தாண்டி மனதுக்கு சந்தோஷம் தரக்கூடியவை சினிமாவுல வருகிற காமெடி காட்சிகள்தான் நமக்கு எவ்வளவு சோகங்கள் இருந்தாலும் நாம அதை மறந்து கொஞ்ச நேரம் சந்தோஷமாய் இருக்கக் காரணமே காமெடி நடிகர்கள் தான். அப்படி நம்ம தமிழ் சினிமால கிட்டத்தட்ட மூன்றாவது தலைமுறையாக நடிச்சிகிட்டு இருந்தவர் தான் நம்ம "சனங்களின் கலைஞன்" விவேக் அவர்கள்.



வெறும் நகைச்சுவை நடிகர் என்பதையும் தாண்டி எத்தனையோ படங்களில் சிறப்பாக நடிச்சிருக்காரு அவர். பல விருதுகளையும் வாங்கியிருக்கிறார். இந்த வீடியோவில் நடிகர் விவேக் வாங்கிய விருதுகள் பற்றிதான் பாக்கப் போறோம்
நம்ம எல்லாரும் அவரை செல்லமா சின்னக் கலைவாணர் னு கூப்பிடுவோம் இல்லையா? அதற்குப் பொருத்தமா 2006-ம் ஆண்டு தமிழக அரசு திரைப்படத்துறைக்கு விவேக் அளித்த பங்களிப்பைப் பாராட்டி "கலைவாணர்" அவார்டையே வழங்கி அவரை கெளரவிச்சிருக்காங்க தெரியுமா?
அதுமட்டுமில்லாம சிறந்த நகைச்சுவை நடிகராக தமிழக அரசின் விருதை 5 முறை வாங்கியிருக்கார் அவர்.
முதன் முறையா 1999 ஆம் ஆண்டுல வெளிவந்த "உன்னருகே நானிருந்தால்" படத்துக்காக தமிழக அரசுடைய சிறந்த நகைச்சுவை நடிக்கருக்கான விருது அவருக்குக் கிடைச்சது. தொடர்ந்து, 2002 ல ரன் படத்துக்காகவும், அதுக்கு அடுத்த வருஷமே அதாவது 2003 ல வெளியான பார்த்திபன் கனவு படத்திற்காகவும் தொடர்ந்து அவார்டு வாங்கினார்.
பிறகு 2005 ல வந்த அந்நியன் படத்துக்காகவும், 2007 ல் நம்ம சூப்பர் ஸ்டார் ரஜினியோட சேந்து அவரு பட்டையைக் கிளப்பின "சிவாஜி" படத்துக்காகவும் அவருக்கு தமிழக அரசின் சிறந்த நகைச்சுவை நடிகருக்கான விருது வழங்கப்பட்டு கவுரவிக்கப்பட்டது.
தமிழக விருதுகள் மட்டும் இல்லாமல் தேசிய தமிழ் திரைப்பட விருதுகளில் கூட அவர் சிறந்த காமெடியன் விருதை நான்கு முறை வாங்கியிருக்கிறார். ரன், சாமி, குருவி, வெடி படங்களுக்காக அவருக்கு இந்த விருதுகள் கிடைத்தன.
சினிமாவுக்கு வழங்கப்படக்கூடிய பெரிய விருதுகள்ல ஒன்னான ஃபிலிம்பேர் விருதைக்கூட அவர் விட்டு வைக்கலங்க. அதையும் ஒரு முறை இரண்டு முறை இல்ல 4 முறை வாங்கியிருக்காரு விவேக்.. அதில மூணு வருடங்கள் வரிசையா அவரே வாங்கினார். ரன் படத்திற்க்காக 2002 லயும் அடுத்த வருடமே 2003 ல சாமி படத்துக்காகவும், 2004 ல் வந்த பேரழகன் படத்திற்காகவும் வாங்கினார். ஒரு சின்ன கேப் விட்டு, 2007ம் ஆண்டு சிவாஜி படத்துக்காக நான்காவது முறையா சிறந்த நகைச்சுவை நடிகர் விருதை பிலிம்பேர் கிட்ட இருந்து வாங்கினார் விவேக்
நகைச்சுவை நடிகராக மட்டுமில்லாம “படிக்காதவன்” படத்துக்காக சிறந்த துணை நடிகருக்கான பிலிம்பேர் விருதும் அவருக்கு வழங்கப்பட்டுள்ளது.
அது போக "குரு என் ஆளு" படத்துக்காக சிறந்த நகைச்சுவை நடிகருக்கான எடிசன் விருது, வேறு சில படங்களுக்காக ஏசியா நெட் திரைப்பட விருது, ஐடிஎஃப் ஏ விருதுகள் அப்படின்னு பல விருதுகளை வாங்கிக் குவிச்சிருக்காருங்க.
இவை எல்லாத்துக்கும் மேல 2009ஆம் ஆண்டு இந்திய அரசு விருதுகளில்ல மிகப் பெரிய விருதான பத்மஸ்ரீ அவார்டையும் வாங்கியிருக்கார். அதனால தான் அவருடைய படங்கள்ல பத்மஸ்ரீ விவேக் அப்படின்னு டைட்டில் கார்டுல போட்டிருப்பாங்க.
அப்பேர்ப்பட்ட ஒரு கலைஞனுடைய இழப்பு உண்மையிலேயே ஈடு கட்ட முடியாத ஒரு சோகம் தான். ஆனா அவர் நம்மை விட்டுப் போகலை. அவருடைய சினிமாக்கள் மூலமும், அவர் நட்டு வச்சிட்டுப் போன ஆயிரக்கணக்கான மரங்கள் மூலமாவும் நம்ம கூட வாழ்ந்து கிட்டே தான் இருப்பாரு.
மறுபடியும் இன்னோரு வீடியோவுல மீண்டும் சந்திக்கலாம். நன்றி.

ஞாயிறு, 28 மார்ச், 2021

தலைமுறை இடைவெளி

28 மார்ச் 2019 அன்று ஃபேஸ்புக்கில் எழுதியது. 

ஒரு தலைமுறை என்பது எத்தனை ஆண்டுகள் என்பதற்குப் பொதுவாக சொல்லப்படும் பதில் 33 ஆண்டுகள் என்பது. ஆனால் இன்றைய காலத்தில் பார்த்தால் 10 ஆண்டுகளே மிகப்பெரிய வித்தியாசத்தை உணர வைக்கின்றன. உங்கள் வயது 30 ஆ? உங்களைச் சுற்றி உள்ள 20 வயது இளையோரைக் கவனித்துப் பாருங்கள். உங்களுக்கும் அவர்களுக்கும் பெரும் வித்தியாசத்தைக் காண முடியும். உங்கள் பழக்க வழக்கங்களுக்கும் அவர்கள் பழக்க வழக்கங்களுக்கும், உங்கள் செய்கைகள், பாஷை, என பல விஷயங்களில் மாற்றங்கள் தெரியும். அதே போல் மேல்நோக்கியும். 40 வயதுடையோரைக் கொஞ்சம் கவனியுங்கள். போலவே 20 வயது இளைஞர்களுக்கும் 10 வயது சிறுவர்களுக்கும் உள்ள வித்தியாசமும் மலைக்க வைக்கிறது. 

தகவல் தொடர்பும், தொழில்நுட்பமும் வளரும் வேகம் இந்த மாற்றத்தைச் சாத்தியமாக்கியிருக்கிறது. அது நன்மையை நோக்கிய மாற்றமா? கலாச்சாரமோ, கல்வியோ, தொழிலோ - நுனிப்புல் அறிவு கொண்டு - அழிவு நோக்கிய மாற்றமா என்பது உங்கள் பார்வைக்கே விட்டு விடுகிறேன்.

தலைவரே

29 மார்ச் 2019 அன்று ஃபேஸ்புக்கில் எழுதியது. 
போனமாசம் நமக்கு வண்டி ஓட்டிய ஒரு ஓலா கேப் டிரைவர் "இப்ப இருக்குற தலைவர்கள்லயே சிறந்தவர் சரத்குமார் தான் சார்" என்றார். எனக்கு தூக்கி வாரிப் போட்டது. அவர் சரத் அனுதாபி போல. அதுவும் அவரது சாதிகாரணமாக. 
எம்.ஜி.ஆர் ஒருமுறை "காமராஜர் என் தலைவர், ஆனால் அண்ணா என் வழிகாட்டி" என தவறுதலாகச் சொல்லி, அது பெரும் பிரச்சினையாக மாற........ அதை வேறொரு பொது மேடையில் வாலியை வைத்து சமாளிப்ஸ் செய்யச்சொல்லி அவரும் எம்.ஜி.யாரைக்காப்பாற்ற வேண்டி "வழிகாட்டி" என்ற வார்த்தையை உயர்த்திப் பேசி, "தலைவர்" என்ற வார்த்தையை "பஞ்சாயத்துத் தலைவர், கட்சித்தலைவர்" என்று குடலாப்பரேஷன் செய்து "தலைவர்" என்ற வார்த்தைக்கு அர்த்தத்தை மாற்றியது போல......... 
பள்ளிப்பாடத்தில் நான் படித்த "தலைவர்" என்ற வார்த்தைக்கு அர்த்தம் வேறு.............. இன்றைக்கு "தலைவரே" என்ற வார்த்தை எப்படியெல்லாம் மாறி விட்டது?


புதன், 24 பிப்ரவரி, 2021

ஐமேக்ஸ் அனுபவங்கள்

ஐமேக்ஸில் ஆங்கிலப் படங்கள் பார்த்த நண்பர்களின் சுகானுபவங்களைக் கேட்ட பிறகு அதில் ஒரு படமேனும் பார்த்து விட வேண்டும் என்று வெறிகொண்டு திரிந்துகொண்டிருந்தேன். என்ன செய்ய? கோவையில் "ஐமேக்ஸ்" இல்லை, ப்ரோசோன் மால் இல் "ஐநாக்ஸ்" மட்டுமே இருக்கிறது. எனவே நமக்குக் கொடுத்து வைக்கவில்லை. சென்னை அல்லது பெங்களூரு தான் அதற்கு ஒரே வழி. ஆனால் சென்னைக்கெல்லாம் மீட்டிங்குக்காக போன வேகத்தில் திரும்பி வந்ததால் பார்க்க நேரம் அமையவில்லை. எனவே அது கிட்டத்தட்ட நான்கு வருட ஆசை.

"ஜங்கிள் புக்" ரிலீஸ் ஆன சமயம் ஒருமுறை பெங்களூர் சென்றிருந்தேன். படம் பல தியேட்டர்களில் ரிலீஸ் ஆகியிருந்தபடியால், அன்று பார்த்தே தீர்வேன் பேர்வழி என்று கிளம்பி, ஐமேக்ஸூக்கும் ஐநாக்ஸூக்கும் வித்தியாசம் தெரியாமல் ஐநாக்ஸில் டிக்கெட் புக் செய்து, அதிலும் பெங்களூர் டிராஃபிக்கை கணக்குப் போடத் தெரியாமல் நீந்திப்போய் படம் துவங்கி 40 நிமிடம் கழித்துப் போய் சேர்ந்து (ஐநாக்ஸ் அனுபவம் என்னவோ நன்று தான்) பாதியிலிருந்து படம் பார்த்து "என்னடா இது? ஸ்கிரீன் நார்மல் சைஸ் அளவுக்குத்தான் இருக்கிறதே" என்று யோசித்து மண்டை குழம்பி பின்னாளில் இது "ஐமேக்ஸ்" இல்ல பக்கி, இது "ஐநாக்ஸ்" என்று ஒரு பெரிய பல்பு வாங்கியிருந்தேன்.
- எஸ்கா

வெள்ளி, 29 ஜனவரி, 2021

முன்முடிவுகளுடன் அணுகக் கூடாது


29 ஜனவரி 2016 அன்று ஃபேஸ்புக்கில் எழுதியது

எந்த ஒரு விஷயத்தையும் பார்த்த உடன் முன்முடிவுகளுடன் அணுகக் கூடாது என்பது அனுபவ வாக்கு. ஒரு நிகழ்வை பார்த்த உடன் முடிவெடுப்பது பாமரர் பழக்கம்.

2012 ல் மாதவன், ஆர்யா நடித்து வெளிவந்த வேட்டை படத்தில் மாதவன் குண்டாக பொதபொதவென்று இருக்கிறார். சார்மிங் போச்சு என்று அப்போதைய விமர்சனத்தில் பலரும் குறிப்பிட்டிருந்தார்கள். அதுவும் தன் உடலை கட்டுக் கோப்பாக வைத்திருக்கும் ஆர்யாவுக்கு அண்ணனாக என்றதும் "அவ்ளோ தான், எந்த ஒரு பிரபல ஹீரோவும் மார்க்கெட் முடியும் நேரத்தில், அதுவும் டபுள் ஹீரோ சப்ஜெக்டில், அத்தி பூத்தார்ப் போல் கொடுக்கும் ஹிட் இந்த வேட்டை" என்றும் ஒருவர் எழுதியிருந்தார்.
ஆனால் அதை மீறி நான்கு ஹிட் படங்களை ஹிந்தியில், அதிலும் ஒன்றாக இந்தியாவின் டாப் டென் கலெக்ஷனில் இடம் பிடித்த "தனு வெட்ஸ் மனு ரிட்டர்ன்ஸ்" என்றொரு மகா மெகா ஹிட்டைக் கொடுத்தார் அவர்.
வேட்டை படத்தின் ரிலீஸ் தேதி 2012 ஜனவரி 14. "இறுதிச் சுற்று" இயக்குனர் 2011 செப்டம்பரிலேயே மாதவனுக்குக் கதை சொன்னதாக விகடன் விமர்சனம் குறிப்பிட்டிருக்கிறது. இந்தப் படத்துக்காக மாதவன் 3 ஆண்டுகளாகத் தயார் ஆனார் என்று மற்றொரு செய்தி சொல்கிறது. பாக்ஸிங் கோச்சுகள் இப்படித்தான் பல்க் ஆக இருப்பார்கள் என்று ஹோம்வொர்க் செய்து (பெசன்ட் நகர் ரவி நினைவிருக்கிறதா? சிங்கம் 1 படத்தில் சூர்யாவுடன் தியேட்டரில் மோதுவாரே) தயார் ஆனதாக மாதவன் ஒரு பேட்டியில் சொல்லியிருக்கிறார். இப்போது புரிகிறதா "வேட்டை" படத்தில் மாதவனின் பொதபொத உடம்பின் ரகசியம்?



உஷார். வாட்ஸ் அப் புல மாட்டாதீங்க.

 29 ஜனவரி 2017 அன்று ஃபேஸ்புக்கில் எழுதியது. 

பெங்களூருவில் உள்ள எனது நண்பருடைய நண்பருடைய நண்பருடைய நண்பருடைய நண்பர் ஒருவர் தனது நிறுவனம், தான் செய்யும் சேவை பற்றி நெகடிவ் ஆன இரண்டு செய்திகள் வாட்ஸ் அப்பில் பரவுவதை கண்டுபிடித்தார். அதனால் அவரது பிஸினஸ் பாதிக்கப்பட்டது. அதை அனுப்பியவன் யாரென்று உடனடியாகக் கண்டுபிடித்தாயிற்று. இது மூன்று மாதங்களுக்கு முந்தைய கதை. அதுவரை ஓகே. 

தற்போது ஒரு அதிர்ச்சியான, ஆச்சரியமான விஷயம். அரசு சைபர் கிரைமுக்கு அப்ளை செய்து, மேலும் ஒரு தனியார் டெக் நிறுவனத்துடன் சேர்ந்து, கொஞ்சம் பணமும், 45 நாட்களும் செலவு செய்து இதற்கு மூல காரணம் யார் என்று கண்டுபிடித்து விட்டார்கள். (அது அவரது பிஸினஸ் எதிரி) இதுவும் கூட ஓகே. 

அடுத்த பாயிண்ட் தான் மிக முக்கியம். கடந்த மூன்று மாதமாக யார் யார், எங்கெங்கே, யாருக்கு, எப்பெப்போ, எந்தெந்த குரூப்புக்கு அந்த மெஸேஜை ஷேர் செய்திருக்கிறார்கள் என்று ஆதி முதல் அந்தம் வரை (போன் பில் போல) ஒரு நம்பர் விடாமல் அத்தனை நம்பரும் இப்போது கிடைத்து விட்டனவாம். இப்போது அவர் நினைத்தால் அத்தனை பேர் மேலும் ஆக்ஷன் எடுக்க முடியும். சட்டப்படி தவறான செய்தியைப் பரப்பிய அனைவரும் குற்றவாளி. 

ஒரு சாதாரண நிறுவனத்தாலேயே இந்த அளவுக்கு முடியும் என்றால் டாட்டா, பிர்லா, கோலா, மேகி போன்ற பெரு நிறுவனங்களால் எந்த அளவுக்கு தோண்டித் துருவ முடியும்? வாட்ஸ் அப்பில் தேவையில்லாமல் எல்லாவற்றையும் ஷேர் செய்து நாளை பிரச்சினையில் மாட்டிக் கொள்ளாதீர்கள். ஜாக்கிரதை. 

1. வாட்ஸ் அப்பில் வருபவை 95 சதவீதம் பொய்களே (உதா - அப்துல் கலாம் சொன்ன தத்துவம், தேசிய விளையாட்டு ஹாக்கி போன்றவை) 

2. வாட்ஸ் அப்பில் வருவதை நம்பி முடிவு எடுக்காதீர்கள் (உதா - தடுப்பூசி, அனிருத்) 

3. வாட்ஸ் அப்பில் வருவதை நம்பி ஷேர் செய்யாதீர்கள் (முக்கியமாக குரூப்புகளுக்கு) 

4. வாட்ஸ் அப்பில் ஷேர் செய்தால் நம்மை கண்டுபிடிக்க முடியாது என நினைக்காதீர்கள் (டெக்னாலஜி டைனோசர் வேகத்தில் வளர்ந்து விட்டது) 

5. ஒரு செய்தி தவறான செய்தியாக இருந்து அதை நீங்கள் ஷேர் செய்திருந்தால் நீங்களும் அதற்குப் பொறுப்பு (சட்டப்படி உங்கள் மேஸ் கேஸ் போடலாம்) 

6. ஆதாரம் இல்லாத எதையும் ஷேர் செய்யாதீர்கள். நீங்கள் ஷேர் செய்யும் செய்திக்கு யாரேனும் ஆதாரம் கேட்டால் நீங்கள் இன்னொருத்தரைக் கை காண்பிக்க முடியாது. 

உங்கள் நலன் கருதி.

டிஸ்கி - உண்மையான தமிழனாக இருந்தால் இதை ஷேர் செய்யவும்.


புதன், 20 ஜனவரி, 2021

தங்கமணி வந்தாச்

20 ஜனவரி 2013 அன்று ஃபேஸ்புக்கில் எழுதியது.

முகநூல், டுவிட்டர், ப்ளாக் என்று எந்த இடத்திலும் சரளமாகப்புழங்கும் வார்த்தைகளில் ஒன்று "தங்கமணி", ஆன்லைனில் தினசரி சரளமாகப்புழங்கும் பத்தில் ஏழு பேருக்கு "தங்கமணி" என்ற வார்த்தைக்கு சட்-டென்று அர்த்தம் புரிந்து விடுகிறது. ஆனால் "தங்கமணி" என்றால் என்ன அர்த்தம் என்று தெரியாதவர்களும் சிலர் இருக்கிறார்கள். அவர்கள், இன்னும் கல்யாணம் ஆகாத கட்டிளம் காளைகளாகவோ, அல்லது ஆங்கில மீடியத்தில் படித்து அவ்வப்போது ஒன்றிரண்டு தமிழ்ப்படங்களை மட்டும் பார்க்கும் என்.ஆர்.ஐ - களாகவோ, அல்லது தமிழ்ப்படங்களை ரெகுலராகப் பார்க்காதவர்களாகவோ, அல்லது பழைய படங்களை சீன் பை சீன் பார்த்திராத புதிய தலைமுறையாகவோ, முக்கியமாக ஜனகராஜைத்தெரியாதவர்களாகவோ இருக்கலாம்.

அவர்களுக்காகவே இந்த விளக்கம்.
மணிரத்னத்தின் "அக்னிநட்சத்திரம்" படம் நினைவிருக்கிறதா? மனைவிகளுக்கு தங்கமணி என்னும் அடைமொழியை வலையுலகுக்கு தந்த படம் அது.
படத்தில் தன் மனைவி தங்கமணி ஊருக்கு கிளம்பும்போது அவரது கையை பிடித்துக்கொண்டு தங்கமணி, தங்கமணி, என்று அழுவோ அழு அழுவதும் பஸ்கிளம்பிய பின் “எம்பொண்டாட்டி ஊருக்குப் போயிட்டா” என்று பஸ் ஸ்டாண்டையே சுற்றிச் சுற்றி வந்து உற்சாக குரல் எழுப்புவதும், (ட்விஸ்ட் - பஸ் ஸ்டாண்டை முழுமையாகச் சுற்றி விட்டு தங்கமணியை பஸ் ஏற்றி விட்ட இடத்துக்கு வந்தால் கிளம்பிப் போன பஸ் நின்று கொண்டிருக்கும். தங்கமணி முறைத்தபடி நின்றிருப்பார், ஏன்னா, அவரது ஒரு பை தலைவர் கையில் மாட்டி தொங்கிக் கொண்டிருக்கும்) "நீ இன்னும் ஊருக்குப்போகல?" என்று முழிப்பதும், பின்னால் வரும் இன்னும் இரண்டு சீன்களில் "நோ தங்கமணி எஞ்சாய்" என்று ஆனந்தப் படுவதும் அட்டகாசமான ஜனகராஜ் ஸ்டைல்.
"தங்கச்சிய நாய் கடிச்சிட்சிப்பா.." என்று ரஜினியிடம் ஒரு படத்தில் புலம்புவாரே... அந்த கிளாஸிக் காமெடியை ஒத்த அடுத்த கிளாஸிக் இந்த தங்கமணி புலம்பல்ஸ்..
"தங்கமணி வந்தாச்" என்றால் எனக்குக்கல்யாணம் ஆகி அம்மணி வீட்டுக்கு வந்தாச்சு என்று அர்த்தம், புரிகிறதா டவுட்டு கேட்ட அன்பர்களே?
((((((((((((((((((( "அக்னிநட்சத்திரம்" - மனைவிகளுக்கு தங்கமணி என்னும் அடைமொழியை வலையுலகுக்கு தந்த படம். மனைவி ஊருக்கு கிளம்பும்போது அழுவதும் பின் “என் பொண்டாட்டி ஊருக்குப் போயிட்டா” என்று உற்சாக குரல் எழுப்புவதும் ” நோ தங்கமணி எஞ்சாய்” என்று ஆனந்தப் படுவதும் ஜனகராஜுக்கே அளவெடுத்த சட்டை.
இது நண்பன் "சேலம் தேவா" - வின் குறிப்பு..)))))))))))))))))))))))

ஒவ்வொரு பெண்ணும் வெற்றியடையாமல் பார்த்துக்கொள்ள ஒரு ஆண்

20 ஜனவரி 2014 அன்று ஃபேஸ்புக்கில் எழுதியது. 

 Ilangovan Balakrishnan தன் முகநூல் சுவற்றில் பதிந்திருந்தார்.

------------------------------------------------------------------------------------------------------------------------------------------------------------------------------------------------------சமுதாயத்தில் ஏதேனும் ஒரு துறையில் சாதித்திருக்கும் சாதனைப் பெண்கள் சிலரை ஒவ்வொருவராக நினைத்துக் கொள்கிறேன்....
பெரும்பாலும் திருமணமாகாதவராய் இருக்கிறார்கள், கணவனை இழந்தவராக இருக்கிறார்கள் அல்லது கணவனை விட்டுப் பிரிந்தவராக இருக்கிறார்கள்.
நீங்களும் உங்களுக்குத் தெரிந்த சாதனைப் பெண்களை நடு நிலையோடு சொல்லிப்பாருங்கள். என்ன காரணமோ தெரியவில்லை 90% இப்படித்தான் அமைந்திருக்கிறது.
"ஒவ்வொரு ஆணின் வெற்றிக்குப் பின்னும் ஒரு பெண் இருக்கிறாள்" - என்று பெருமையுடன் சொல்லிக் கொள்ளும் நாம் ஒவ்வொரு பெண்ணும் வெற்றியடையாமல் பார்த்துக்கொள்ள ஒரு ஆண் இருக்கிறான் என்ற ரீதியில் தான் வாழ்ந்துகொண்டிருக்கிறோம் போலிருக்கிறதே....
எங்கேயோ...ஏதோ.... தவறு இருக்கிறது என்பது மட்டும் தெளிவாய் புலப்படுகிறது.
------------------------------------------------------------------------------------------------------------------------------------------------------------------------------------------------------

நானும் இதை பலமுறை யோசித்திருக்கிறேன். தன் குடும்ப ஆண்களை இழந்த அல்லது தன் குடும்ப ஆண்களால் வஞ்சிக்கப்பட்ட பெண்கள் வெறியோடு போராடி மிக நல்ல நிலைக்கு வந்திருக்கிறார்கள்.
நல்லவனாய் வாழ்ந்து வீட்டுச்சுமைகளை ஏற்கும் ஒரு ஆணிடம் "வர்ற வருமானத்துக்குள் சிக்கனமா அட்ஜஸ்ட் பண்ணி குடும்பம் நடத்தும்மா" என்றே இந்தியப் பெண்கள் போதிக்கப்படுகிறார்கள்.
ஸோ, கொஞ்சம் குயுக்தியாய் யோசித்தால், நாம் நல்லவனாக இருந்து நம் வீட்டுப்பெண்களிடம் ஒளிந்து கிடக்கும் ஏதோ ஒரு திறமையை அழித்து விடுகிறோமோ?
பல வருடங்களுக்கு முன் என் நண்பன் ஒருவன் சொன்னான் "வர்ற சம்பளத்துக்குள்ள சிக்கனமா வாழ்க்கை நடத்தணும்னு சொல்றது நல்ல விஷயம் தாங்க, ஆனா தேவையான செலவைப் பண்ணிட்டு, அதற்கும் சேர்த்து அதிகமா சம்பாதிக்கணும்ங்க"
கொஞ்சம் யோசித்துப்பாருங்கள். திருமணத்திற்கு முன் வேலைக்குச் சென்று நன்றாகச் சம்பாதித்த அல்லது சம்பளம் குறைவாகவே இருந்தாலும் தன் திறமையை நிரூபித்த ஒரு பெண்ணை திருமணம் என்ற சடங்கின் மூலம் இந்தியாவில் என்ன நிலைக்கு ஆளாக்கி வைத்திருக்கிறோம்?
குழந்தைகளைப் பார்த்துக்கொள்ளல், வீட்டைப் பார்த்துக்கொள்ளல் என்று ஆயிரம் தடைகள் அவளுக்கு. இந்தப்போக்கிலேயே செல்லும் ஒரு இந்தியக் குடும்பத்தின் ஆண் திடீரென இறந்து போனால் அந்தக் குடும்பம் அட் லீஸ்ட் அடுத்த தலைமுறை வரையாவது நாசமாய் போகிறது.
இந்தத் திடீர் சோகத்தின் பாரத்தோடும், குடும்பத்தைக் காப்பாற்றும் பாரத்தோடும் பல வருடங்கள் கழித்து ஒரு பெண் வேலைக்குப்போக ஆரம்பித்தால் அவளின் பழைய திறமை மங்கிப் போயிருக்காதா? ஏன்? நாம் இன்டர்வியூவுக்குப் போகும்போதே ப்ரொஃபைலில் ஒரு ஆறு மாதம் வேலைக்குப்போகாமல் கேப் விழுந்திருந்தால் ஹெச்.ஆர் ஆசாமிகள் என்னென்ன கேள்விகள் கேட்கிறார்கள்?

ஞாயிறு, 17 ஜனவரி, 2021

சினிமா (சீர்காழியில் ஒரு பள்ளி)

16 ஜனவரி 2017 அன்று ஃபேஸ்புக்கில் எழுதியது.

சீர்காழியில் ஒரு பள்ளிக்கு சென்றிருந்தேன். "க்ளாஸ் ரூம் அப்சர்வேஷன்" வேலை. மாலை பள்ளி முடிந்ததும், வேன் ஏறுவதற்காகக் காத்திருந்த ஒரு வரிசையை வேடிக்கை பார்த்துக் கொண்டிருந்தேன். உற்சாகமாகப் பேசிக்கொண்டும், ஆடிக்கொண்டும் நகர்ந்து கொண்டிருந்தார்கள். மறுநாள் துவங்கி நான்கு நாட்கள் விடுமுறை உற்சாகம். அதில் ஒருவன், சத்தமாக "வரலாம் வா, வரலாம் வா, பைரவா" என்று துவங்கி மூன்று, நான்கு வரிகளை ஸ்பஷ்டமாகப் பாடினான். கூடவே இன்னும் நான்கு பேர் கோரஸ். "படம் பாத்துட்டியா?" (அன்றைக்குத் தான் ரிலீஸ், சும்மா) கேட்டேன். "ஓ, மூணு தடவை பார்த்துட்டேன்" என்றான். (பதறாதீர்கள், அவன் டிரெயிலரைச் சொன்னான்). ஆறு வயது இருக்கலாம். "என்ன படிக்கிறே?" என்றேன். "கிரேடு 1" என்றான். 

அன்று மதியம் அதே பள்ளியில் நான்காம் வகுப்பில் அமர்ந்திருந்தேன். அறிவியல் பாடம். "விலங்குகள் எப்படி நடந்து கொள்கின்றன?" என்பது போன்ற பாடம். ஒன்னொன்றாக டீச்சர் நடத்திக் கொண்டிருக்க, கொஞ்சம் போரடித்ததால், "குரங்கு எப்படி மரத்துக்கு மரம் தாவும்?" என்ற கேள்வியின் போது நான் உள்ளே நுழைந்து "ஜங்கிள் புக் யாரெல்லாம் பாத்தீங்க?" (மோக்லியை, குரங்குகள் தூக்கியபடி மரத்திற்கு மரம் எப்படி தாவின என்பது என் கேள்வி) என்றதும் "சார், சார், சார், சார்" என்று ஒரே சத்தம். 99.99 சதம் பேர் கை தூக்கினார்கள். 

அதற்கு இரு நாட்களுக்கு முன் மாயவரத்தில் உள்ள ஒரு பள்ளியில் "நீட்" எக்ஸாம் பற்றிய ஒரு அறிமுக வகுப்பில் பேச அழைத்திருந்தார்கள். மாணவர்கள், அவர்தம் பெற்றோர் என்று சுமார் 600 பேர். சுமார் ஒரு மணி நேரம். பேசிய பிறகு, பெற்றோர் உட்பட பலரும் நெருங்கி வந்து பேசிச் சென்றார்கள். நடுநடுவே கொஞ்சம் மோடிவேஷன் வகுப்பு, கொஞ்சம் டெக்னாலஜி என்றெல்லாம் ஜாலியாகப் பேசிக்கொண்டிருந்ததில் மாணவர்களும் நெருங்கி விட்டார்கள். அதில் ஒரு ஆறாம் வகுப்பு மாணவன் கூடவே சின்னச் சின்ன உதவிகள் செய்து கொண்டிருந்தான். கிளம்பும் போது "ஸ்மார்ட் போன் வச்சிருக்கியா?" என்றதற்கு "ம்" என்றவன், "சார், சல் மார் பாட்டு இருந்தா அனுப்புங்க சார்" என்றான். 

இவற்றில் உங்களுக்கு என்னென்ன விஷயங்கள் புரிகின்றன?

யூபர்... You lost a customer.

18 ஜனவரி 2017 அன்று ஃபேஸ்புக்கில் எழுதியது.

யூபர் (ஊபர்?) டாக்ஸியில் ஒரு சரியான இன்வாய்ஸ் பெறுவது பெரும் தலைவலியாக உள்ளது. PDF தான் சரியான ஃபார்மேட். ஆனால் இவர்கள் இன்வாய்ஸை ஜி மெயிலின் கன்டென்ட் பகுதியில் பொதிந்து அனுப்புகிறார்கள். அதுவும் சிங்கிள் jpg இல்லை. மேப் ஒரு பார்ட், அதன் கீழ் டெக்னிகலி வேறொரு பார்ட், அதன் கீழ் ஒரு பார்ட் என இருக்கிறது. jpg யாக இருந்தாலாவது ரைட் க்ளிக் செய்து சேவ் செய்யலாம் என்று பார்த்தால் மேப் பகுதி கூகிள் மேப்புக்கு செல்கிறது. கீழ்ப்பகுதி வெப் பேஜ்-ஐயே சேவ் செய்யச் சொல்கிறது.

அட்டாச் மெண்ட் ஆக இல்லாததால் அதை வேறு யாருக்கும் அனுப்ப முடியாது. அனுப்பினால் லோக்கல் டி.வியில் படத்தைச் சுற்றி விளம்பரம் வருவது போல இன்வாய்ஸைச்சுற்றி ஜிமெயிலின் தேவையற்ற துணுக்குகளுடன் உடைந்தவாறு போகிறது. அந்த எளவை பிரிண்ட் போட்டாலும் அதே கதை. சுற்றி இருக்கும் ஜிமெயில் துணுக்குகளுடன் தான் பிரிண்ட் ஆகிறது.
யூபர் ஆப் இல் கஸ்டமர் கேருக்கென மெயில் ஐ.டி யே இல்லை. அவர்களிடம் பேசவும் எண் இல்லை. கால் மணி நேரம் ஆப்பில் போராடி ட்ரிப் விபரங்களுக்குள் புகுந்து, பல ஆப்ஷன்களைக் கடந்து இன்வாய்ஸூக்கென உள்ள ஒரு ஆப்ஷனைக் கண்டுபிடித்து ரிக்வெஸ்ட் அனுப்பினால், வெறும் ப்ளெயின் பேப்பரில் டைப் செய்தது போல ஒரு PDF அனுப்புகிறார்கள். எந்த அப்ரூவல் மேனேஜர் அல்லது ஹெச் ஆர் வெள்ளைக் காகித இன்வாய்ஸை ஒத்துக் கொள்வான்? இது ஒரு ஃப்ரீலான்ஸ் வேலை வேறு. அது லெட்டர் பேட் ஃபார்மேட்டில் இல்லை, அட் லீஸ்ட் யூபர் லேகோ கூட இல்லை. அவர்களது வெப் சைட்டைக் கண்டுபிடித்து அதில் உள்ளே நுழைந்து தேடினாலும் இதே ப்ளெயின் PDF கதை.
இதில் "ஓலா கேப்" பர்ஃபெக்ட். "இன்வாய்ஸ் தேவை" என்றொரு ஆப்ஷன். ஜஸ்ட் டச். அதுவே மெயில் ஐ.டி யைக் காண்பித்து "அனுப்பவா?" என்கிறது "send" ஐ க்ளிக் செய்தால் அழகாக மெயிலில் PDF ஃபைல் வருகிறது. லோகோவுடன் கூடிய இன்வாய்ஸ் சரியான ஃபார்மேட்டில். சில விநாடிகளில் முடிகிறது வேலை.
எல்லாம் ஆட்டோமேடிக் ஆன சாஃப்ட்வேர் காலத்தில் ஏன் யூபருக்கு இதைச் செய்ய வலிக்கிறது? அவர்களது கேப் புக்கிங்கும் "ஓலா" வை கம்பேர் செய்கையில் கொஞ்சம் சுத்தல் முறைதான். (மேலும் யூபரில் கேப் புக் செய்ய பே டி எம் - மில் குறைந்தது 200 ரூபாய் வைத்திருக்க வேண்டும். இது வேறு தலைவலி) இதற்காக நான் டென்ஷனுடன் அரை மணி நேரம் செலவிட்டிருக்கிறேன். உன் டாக்ஸியில ஏறுனதுக்கு எனக்கு இது தேவையா?
எனக்கு 210 ரூபாய் நட்டம். மை டியர் யூபர்... You lost a customer.

இன்றைய அப்டேட் (18 ஜனவரி 2021) - கடந்த இரண்டு வருடங்களாக நான் உபயோகிப்பது ரெட் டாக்ஸி. அதிலேயே கோ டாக்ஸி என்றொரு வகையும் இருக்கிறது. கட்டணமும் சற்றே (சுமார் 2 அல்லது 3 சதம்) குறைவு. சர்வீஸூம் நன்று. ஆப் புக்கிங்கும் உண்டு. போன் கால் புக்கிங்கும் உண்டு. அதில் பலரும் அட்டாச்மெண்ட் டாக்ஸி ஓட்டுவதால், ஒருமுறை புக் செய்தவரை, திருப்தியாக இருந்தால் மறுபடி கூப்பிட்டுக் கொள்கிறேன் - ஆனால் மறுபடி புக்கிங் வேண்டும். பில் வேண்டும் என்று சொல்லி. பில் வரும் முறை அருமை. ட்ரிப் முடித்ததும் ஒரு லிங்க் வருகிறது. அதைத் தொட்டால் வெப் பேஜ் சென்று பி.டி.எஃப் டவுன்லோட் செய்து கொள்ளலாம். அதே போலத் தான் ஆப் - பிலும். முன்பே கொடுத்து வைத்த ஈ.மெயில் ஐடிக்கு நமக்கு நாமே பில் அனுப்பிக் கொள்ளலாம். அழகான பி.டி.எஃப் சென்று விடுகிறது.

சீதக்காதி - உணர்ச்சிக் கலவை

18 ஜனவரி 2019 அன்று ஃபேஸ்புக்கில் எழுதியது 


நல்லாருக்குல்ல. 

என்னய்யா இழுக்குது.

சூப்பர்ல.

செம காமெடி.
ஒரு மாதிரியா போகுதே.
இது விஜய் சேதுபதி படம் தானா?
அருமையா இருக்கு இந்த சீன்.
இதுக்கு எதுக்கு விஜய் சேதுபதி?
ரிப்பீட் ஆனாலும் ரீடேக் சீன் அருமை.
என்னய்யா சொல்ல வர்றீங்க?
நாடகக்கலைஞர்கள்-லாம் பாவம்ல.
"தனபால்" கேரக்டர் என்னமா நடிச்சிருக்கார்.
ஏன்யா இவ்ளோ இழுக்குறீங்க?
இது ஒரு வேள டாகுமெண்ட்ரியா இருக்குமோ?
படம் ரொம்ப பெருசோ? இன்னும் முடியலையே

என்று கலவையான உணர்ச்சிகளைக் கொடுத்திருக்கிறது "


சீதக்காதி".


#Amazon_Prime

புதன், 13 ஜனவரி, 2021

கும்பகோணம் அம்மா ஊர்.


கும்பகோணம் அம்மா ஊர். செல்லுமிடமெல்லாம், எனது சுயத்தை இழந்து "கங்கா பையன்" என்றே அழைக்கப்படுவேன். எல்லா இடங்களிலும், ஊர்களிலும் கிடைக்கும் சார், வாங்க, போங்க மரியாதைகள் கிடைக்காது.

"நீ என்ன பண்றே? எங்கே இருக்கே? சாப்பிட்டுட்டுப் போடா" வகையறாக் கேள்விகளும் உரையாடல்களும் தான். அவையும் மிகவும் பெருமிதமாகவே இருக்கும். "உங்க அம்மா என் ஃப்ரெண்டு தெரியுமா? உங்க அம்மா எங்க பக்கத்து வீடுதான், உங்க அம்மாதாண்டா எனக்கு மணப்பெண் தோழி" போன்றவற்றையும் எதிர்கொள்வேன். அம்மா எத்தனையோ பேருக்கு பல விதங்களில் சிறிதும், பெரிதுமாக உதவியிருக்கிறார். வாய் அதிகம் என்பதால் நிறைய நண்பர்கள்.
நான் என்ன வேலை செய்கிறேன் போன்ற விபரங்கள் தெரிந்ததும் அவர்களின் பெருமிதமும் கூடும். "பாரேன், கங்கா பையன் நல்லா இருக்கான்" என அந்தப் பெருமிதத்தின் கிரெடிட்டையும் "அம்மா"வுக்கே தருவார்கள்.
அந்தப் பெருமிதத்தில் கிடைக்கும் மனப் பூரிப்பே வருடத்திற்கு இரு முறையேனும் என்னை கும்பகோணம் செல்ல வைக்கும்.

வியாழன், 7 ஜனவரி, 2021

ஏமாற்றுவது மட்டுமே வேலை இந்த ஏர்டெல் காரனுக்கு.

2018 ஜனவரி 7 அன்று ஃபேஸ்புக்கில் எழுதியது.

ஏமாற்றுவது மட்டுமே வேலை இந்த ஏர்டெல் காரனுக்கு.

சுமார் 20 அ 25 நாட்கள் முன்பு ஒரு கம்ப்ளெயிண்ட் கொடுத்தேன்
ப்ரீவியஸ் பில் ப்ளானில் பேலன்ஸ் இருந்த சுமார் 25 ஜி.பி டேட்டா, கேரி ஃபார்வேர்ட் ஆகி கரண்ட் ப்ளானுடன் சேர்த்து சுமார் 30 + 25 = 55 ஜி.பி என்று காண்பித்துக்கொண்டிருந்தது. இரண்டு, மூன்று நாட்கள் கழித்து திடீர் என்று ஒரு சுமார் 20 ஜி.பி காணோம். அது வெறும் 5 ஜி.பி ஆக மாறி 55க்கு பதிலாக 35 ஜி.பி என்று மாறி விட்டது.
அப்போதே கம்ப்ளெயிண்ட் செய்து எண் கம்ப்ளெயிண்ட் வாங்கினேன். அவ்வளவு டேட்டா தேவை இல்லாததாலும் வேலைப்பளு காரணமாகவும் ஃபாலோ செய்யவில்லை. கம்ப்ளெயிண்ட் எண் தேடியும் கிடைக்கவில்லை. இன்று போன் செய்து காணாமல் போன டேட்டா என்னாச்சு என்றால் "அதையெல்லாம் ட்ராக் செய்ய முடியாது" என்கிறான்.
சரி என் மொபைல் நம்பரை வைத்து நான் கொடுத்த கம்ப்ளெயிண்ட் நம்பரைக் கொடு, நான் ட்ராக் செய்து கொள்கிறேன் என்றால், ஒவ்வொரு நாளும் நிறைய கம்ப்ளெயிண்டுகள் வருவதால் அப்படி எல்லாம் கண்டுபிடிக்க முடியாது என்கிறான். அழுத்திக் கேட்டு எகிறினால் "அப்படி ஒரு கம்ப்ளெயிண்ட் டே நீ தரவில்லை" என்கிறான்.
2018 ல் வாழ்கிறோம். ஒரு ஸ்கூல் பையனுக்குக் கூடத்தெரியும். என் மொபைல் நம்பரை வைத்து என் ஹிஸ்டரியை எவ்வளவு எளிதாக ட்ராக் செய்ய முடியும் என்று. சும்மா காது குத்திக்கொண்டு திரிகிறான்கள். இருடா, எங்கியோ எழுதி வச்சேன். கண்டுபிடிச்சுட்டு வர்றேன் என்றிருக்கிறேன்.
காசும் டேட்டாவும் என்னுடையதாக இருந்தாலும் கன்ட்ரோல் அவனிடம் இருக்கிறதே...
பிற்சேர்க்கை - இந்த மார்க்கு இம்சை வேற. (ஆனா ஃப்ரீ ன்றதுனால இதையெல்லாம் பொறுத்துக்குறோம்). கோயமுத்தூர்ல உக்காந்து போஸ்ட் போட்டா, சென்னை - ன்னு காமிக்கிறான்.
.

திங்கள், 4 ஜனவரி, 2021

அவார்டு வாங்கலியோ அவார்டு....

2015 ஜனவரி 4 அன்று ஃபேஸ்புக்கில் எழுதியது. 

அவார்டு வாங்கலியோ அவார்டு....

 - மாரியப்பன் பாத்திரக் கடை (நல்லா தெளிவா பேரு தெரியுற மாதிரி அடி.....) 

ஒருமுறை நமது முன்னாள் கம்பேனி ஒன்றில் சில பல லோக்கல் பாலிடிக்ஸூகள் காரணமாக ஆண்டில் ஒருமுறை நடக்கும் விழாக்களில் நமக்கு ஏதும் விருதுகள் கிடைக்காதென்ற நிலை வந்த போது தானைத் தலைவன் கவுண்டமணி அவர்களின் வார்த்தைக்கிணங்க, "இவன் என்னடா நமக்கு கடன் குடுக்குறது, நாம பேங்க் ஆரம்பிப்போம், நாம எல்லாருக்கும் கடன் கொடுப்போம்" என்ற தத்ஸ் மண்டையில் உதித்தது. அது ஒரு ஜென் நிலையை போல இருந்தாலும், வாங்குகிற ஆளாய் இல்லாமல் கொடுக்கிற ஆளாய் இருப்பது சந்தோஷமாகவே இருந்ததது. 

ஆகவே இந்த வருடம், அதாவது போன வருடம் நம்மை மகிழ்வித்த பலருக்கும் விருது கொடுத்து கௌரவித்தால் என்ன என்று தோன்றியது. எல்லாரும் தர்றாங்களே, நீ என்ன ஸ்பெஷலா தர்றே? என்று கேட்பவர்களுக்கு, எல்லாரும் தர்றதை வாங்கிக்கோங்க, அப்டியே போற வழில இதையும் வாங்கிட்டுப் போங்க.... 

இதோ விருதுகள்... முதல் லிஸ்ட்... 

"லிங்கா, சங்கா" விருது 

- சூப்பர் ஸ்டார் ரஜினிகாந்த் 

"தென்னையப் பெத்தா இளநீரு, பிள்ளையப் பெத்தா கண்ணீரு" ஸ்பெஷல் விருது 

- சூப்பர் ஸ்டார் ரஜினிகாந்த் 

"அந்தப் பொம்மையே நீங்க தான் சார்" சிறப்பு ஜூரி விருது 

- சூப்பர் ஸ்டார் ரஜினிகாந்த்துக்கே.. 

"செல்ஃபி புள்ள" விருது

- ஹி, ஹி, அவுங்களுக்கே தான்

"முடிஞ்சா வாங்க, முடியாட்டி போங்க" விருது 

- கமல் ஹாசன் 

"கமலே பரவாயில்லப்பா" விருது 

- சாரு ஹாசன் 

"ஆவாஸ் அஞ்சான்" விருது

- லிங்கு சாமி 

"ரன் லோலா ரன்" விருது, (ஒரு வருடம் ஆனதற்காக) 

- இளைய தளபதி விஜய் 

"மாட்டுத் துணியை தூக்கிப்பாத்த ------------வி" விருது, (டேபிளுக்கடியில் குனிந்து பார்த்தற்கான சிறப்பு விருது)

- இளைய தளபதி விஜய்-க்கே 

- தொடரும்...

டிஸ்கி - இது யார் மனதையும் புண்படுத்த அல்ல.