31 அக்டோபர் 2019 அன்று ஃபேஸ்புக்கில் எழுதியது.
போர்வெல் குழிக்குள் விழுந்து இறந்த குழந்தை யை வைத்து அரசியல் செய்யப்பட்ட போது.
------------------------------------------------
வட இந்தியாவில் என நினைக்கிறேன். படித்த அல்லது கேட்ட செய்தி. அங்கே விதவைகள் அல்லது விவாகரத்தான ஒற்றைப் பெண்மணிகளுக்கு அரசு ஒரு பெரும் தொகையை இழப்பீடு வழங்கத் துவங்கியதாம். தற்போது அங்கே ஏகப்பட்ட விவாரத்து வழக்குகள். கணவனும் மனைவியும் விவாகரத்து செய்து விட்டு ஒரே வீட்டிலேயே ஒன்றாக இருக்கிறார்கள் அல்லது பக்கத்துப் பக்கத்து வீட்டில். இழப்பீடு தர அதிகாரி வரும்போது கணவன் வெளியே போய்விடுவான். இவர்கள் பணம் வாங்கிக் கொள்கிறார்கள்.
இதை விடக் கொடுமை, பலநூறு ஆண்டுகள் பாரம்பரியம், கணவனே கண்கண்ட தெய்வம், தாலி புண்ணியம் என நினைக்கும் இந்த இந்தியாவில் அந்த மாதர் குல மாணிக்கங்கள் கணவன் இறந்து விட்டான் என ஆதாரங்களைத் தயார் செய்து, அவனை வெளியூருக்கு அனுப்பி விட்டு தாலியைக் கழற்றி விட்டு வாழ்கிறார்களாம். இழப்பீடு அதிகாரி வரும்போது தான் ஒரு விதவை என்று கூசாமல் பணம் வாங்கிக் கொள்கிறார்கள். இவர்களுக்கு பணத்திற்கு முன் எதுவும் பெரிதல்ல.
இதே நமது அரசாங்கம் ஜகஜோதியாக நடத்தும் குடிக் கடை புண்ணியத்தில், தினமும் குடித்து விட்டு வந்து பிள்ளைகளையும் பொண்டாட்டியையும் தூக்கிப் போட்டு மிதிக்கும் கேடு கெட்ட அப்பன்கள் இன்னும் தெருவுக்கு இரண்டு பேர் இருக்கிறார்கள். முடிந்தால் பின்மாலை நேரத்தில் அருகில் உள்ள டாஸ்மாக்குக்குச் சென்று பாருங்கள், கிழிந்த லுங்கியும், ஷேவ் செய்யாத முள் தாடியுமாக எத்தனை பேர் சேற்றில் உருண்டு பிரண்டு கொண்டிருக்கிறார்கள் என.
உங்களுக்குப் போலீஸ் நண்பர்கள், வக்கீல் நண்பர்கள் இருந்தால் கேட்டுப் பாருங்கள் எத்தனையெத்தனை துரோகங்கள் பணத்திற்காக, கொலைக் கேஸ்கள் தினமும் நடக்கின்றன என்று. 1000 ரூபாய் காசுக்காக பிள்ளைகளை இன்னும் விற்றுக் கொண்டுதான் இருக்கிறார்கள். இதே அரசாங்கமும், போட்டி விளம்பரத்திற்காக எதிர்க்கட்சிகளும் சேர்ந்து, ஒரு இழப்புக்கு 30 இலட்சம் 40 இலட்சம் ரூபாய் என தூக்கிக் கொடுத்தீர்கள் என்றால் அது ஒரு தவறான முன்னுதாரணம் ஆகி விடாதா? அதற்காக நாளை இந்தக் கேடுகெட்ட அப்பன்கள் குடித்து விட்டு வந்து தன் பிள்ளைகளில் ஒன்றை, அருகில் உள்ள போர்வெல் குழிக்குள் தூக்கிப் போட மாட்டார்கள் என்று என்ன நிச்சயம்?
கருத்துகள் இல்லை:
கருத்துரையிடுக